maria-shamoon-eid-message-nushki-pakistan
نوشکی (نوائے مسیحی نیوز) عیدالفطر کے پُرمسرت موقع پر اسسٹنٹ کمشنر نوشکی ماریہ شمون نے اہلِ نوشکی کے نام اپنے خصوصی پیغام میں تمام شہریوں کو دلی مبارکباد پیش کی ہے۔
انہوں نے اپنے پیغام میں کہا کہ عیدالفطر خوشیوں، محبت، بھائی چارے اور شکرگزاری کا تہوار ہے، جو ہمیں رمضان المبارک کے بعد نصیب ہوتا ہے۔ رمضان کا مقدس مہینہ ہمیں صبر، برداشت، ایثار اور دوسروں کے احساس کا درس دیتا ہے، اور عید کا دن ان اعلیٰ اقدار کو عملی طور پر اپنانے کا بہترین موقع فراہم کرتا ہے۔
ماریہ شمون نے کہا کہ اس خوشی کے موقع پر ہمیں چاہیے کہ ہم اپنے اردگرد موجود ضرورت مند افراد کو بھی اپنی خوشیوں میں شامل کریں اور معاشرے میں ہم آہنگی اور محبت کو فروغ دیں۔ انہوں نے عوام سے اپیل کی کہ وہ عید کے موقع پر اتحاد، امن اور بھائی چارے کا مظاہرہ کریں۔
انہوں نے مزید کہا کہ ایک مضبوط اور ترقی یافتہ معاشرہ اسی وقت تشکیل پاتا ہے جب اس کے شہری باہمی احترام، تعاون اور محبت کے جذبے کے ساتھ آگے بڑھتے ہیں۔ اہلِ نوشکی کو چاہیے کہ وہ اپنے علاقے کی ترقی کے لیے مثبت کردار ادا کریں اور ایک بہتر مستقبل کی تعمیر میں حصہ ڈالیں۔
آخر میں انہوں نے دعا کی کہ اللہ تعالیٰ سب کو صحت، خوشی اور کامیابیوں سے نوازے اور یہ عید سب کے لیے خوشیوں کا پیغام لے کر آئے۔
ایک تبصرہ شائع کریں
Show discipline and civility while commenting and don't use rude words. Thanks for your cooperation