لاہور (نمائندہ نوائے مسیحی)پاک بھارت جنگ میں نمایاں کارنامے پر مسیحی پائلٹ کامران مسیح کو خراجِ تحسین،حالیہ پاک بھارت کشیدگی کے دوران پاک فضائیہ کے مسیحی پائلٹ کامران مسیح نے جس جرات، مہارت اور حب الوطنی کا مظاہرہ کیا، اُس پر قوم کو ناز ہے۔ ان کی شاندار کارکردگی پر مسیحی کمیونٹی کے نمائندہ رہنما عظیم کنول چوہان نے زبردست الفاظ میں خراجِ تحسین پیش کیا۔
عظیم کنول چوہان، جو کہ ممبر مینارٹی ایڈوائزری کونسل حکومت پنجاب، وائس چیئرمین پاکستان مسیحی اتحاد (PMI)، ماڈریٹر خانقاں ڈوگراں پریسبٹری اور نوائے مسیحی کے ڈویژنل کوآرڈینیٹر ہیں، نے کہا کہ کامران مسیح کی دلیری نے ماضی کے ان مسیحی سپوتوں کی یاد تازہ کر دی جو پاکستان ایئر فورس کی تاریخ کا روشن باب ہیں۔
انہوں نے کہا کہ:"1947 کی پہلی کشمیر جنگ ہو، 1965 کی دشمن کے دانت کھٹے کرنے والی جنگ ہو یا 1971 کی پاک بھارت جنگ – مسیحی پائلٹس نے ہمیشہ دشمن کے خلاف آسمانوں پر شجاعت کی تاریخ رقم کی ہے۔"
ان تاریخی جنگوں میں اسکواڈرن لیڈر پیٹرک پیٹرز، فلائٹ لیفٹیننٹ سیسل چودھری، اور دیگر کئی مسیحی افسران نے قوم کے دفاع میں جانیں قربان کیں یا دشمن کے جہازوں کو نشانہ بنا کر فخر کا باعث بنے۔ ان کی خدمات آج بھی پاک فضائیہ کے ریکارڈ کا حصہ ہیں۔
عظیم کنول چوہان نے مزید کہا کہ کامران مسیح کی موجودگی نہ صرف پاک فضائیہ کی پیشہ ورانہ مہارت کا ثبوت ہے بلکہ یہ بھی واضح کرتی ہے کہ پاکستان کی اقلیتیں ملک کے دفاع میں کسی سے پیچھے نہیں۔ انہوں نے حکومتِ پاکستان سے مطالبہ کیا کہ مسیحی ہیروز کو قومی سطح پر بھرپور طریقے سے سراہا جائے تاکہ تمام اقلیتوں میں حب الوطنی کا جذبہ مزید مضبوط ہو۔
نوائے مسیحی کی ٹیم بھی پائلٹ کامران مسیح اور ماضی کے تمام مسیحی ہیروز کو خراجِ عقیدت پیش کرتی ہے، جو پاکستان کے آسمانوں پر ہمیشہ چمکتے ستارے رہیں گے۔
إرسال تعليق
Show discipline and civility while commenting and don't use rude words. Thanks for your cooperation