 |
| Peru: Mother Tells Pope Leo XIV Her Son’s Life Is a Great Blessing from God. Report: Amir Javed. |
چیکلایو، پیرو: ماریہ دے لوس اینجلس گزمین والے نے پوپ لیو چہاردہم سے ملاقات کے دوران اپنی زندگی کی ایک نہایت جذباتی اور ایمان افروز گواہی پیش کرتے ہوئے کہا کہ ان کے بیٹے آگسٹن کی زندگی، تمام مشکلات اور آزمائشوں کے باوجود، ان کے خاندان کے لیے خدا کی ایک عظیم نعمت ہے۔
20 سالہ آگسٹن آٹزم اور مرگی کے مرض میں مبتلا ہے۔ کورونا وبا کے دوران اسے کینسر کی تشخیص بھی ہوئی، جس کے باعث بہتر علاج اور خصوصی نگہداشت کے لیے خاندان کو ایک عرصے تک اس سے الگ رہنا پڑا۔ تاہم ماریہ کے مطابق ان تمام کٹھن حالات نے ان کے ایمان کو کمزور کرنے کے بجائے مزید مضبوط کیا اور انہیں ہر روز خدا کی حضوری کا احساس دلایا۔
ماریہ نے کہا کہ ان کے لیے یہ تمام تجربات دراصل “سب سے بڑی برکت” ثابت ہوئے، کیونکہ آزمائشوں کے درمیان بھی خدا نے اپنی محبت اور موجودگی کو نمایاں کیا۔
انہوں نے ایسے تمام والدین اور خاندانوں کو پیغام دیتے ہوئے کہا کہ چاہے کسی کے گھر میں خصوصی ضروریات رکھنے والا بچہ ہو یا زندگی میں کسی اور قسم کی آزمائش، انسان کو اپنا مکمل بھروسا خدا پر رکھنا چاہیے۔
ماریہ نے کہا کہ خدا ہی ہر مشکل صورتحال میں انسان کو سنبھالتا اور طاقت عطا کرتا ہے۔ انہوں نے لوگوں کو خدا اور مقدسہ مریم کے سپرد رہنے، دعا میں ثابت قدم رہنے اور روزری کی دعا کو کبھی ترک نہ کرنے کی تلقین کی۔
یہ ایمان افروز گواہی اس حقیقت کی یاد دہانی ہے کہ زندگی کی شدید آزمائشوں اور مشکلات کے باوجود، خدا پر مضبوط ایمان انسان کو امید، حوصلہ اور ہر دن آگے بڑھنے کی نئی طاقت عطا کرتا ہے۔
عامر جاوید
کوآرڈینیٹر، نیوم سٹی، سعودی عرب