پشاور؛ ڈبلیو ایس ایس پیکا اہلکار عدنان مسیح ولد ریاض مسیح دورانِ ڈیوٹی ٹریفک حادثے میں جاں بحق ہو گیا۔

پشاور میں ٹریفک حادثے میں جاں بحق ہونے والے ڈبلیو ایس ایس پی اہلکار عدنان مسیح

پشاور میں ایک دلخراش ٹریفک حادثے نے ایک خوشحال مسیحی گھرانے کو غم میں ڈبو دیا، جہاں ڈیوٹی پر مامور ایک محنتی سرکاری ملازم اپنی جان سے ہاتھ دھو بیٹھا۔ ایسٹر کی خوشیاں ماتم میں تبدیل۔ 

تفصیلات کے مطابق واٹر اینڈ سینیٹین سروس پشاور کا اہلکار عدنان مسیح ولد ریاض مسیح  جمعرات کی شام اپنی ڈیوٹی انجام دے رہے تھے کہ جمیل چوک رنگ روڈ کے مقام پر ایک تیز رفتار ٹرک نے انہیں زور دار ٹکر مار دی۔ حادثہ اتنا شدید تھا کہ وہ موقع پر ہی جاں بحق ہو گئے۔

حادثے کی وجہ اور ڈرائیور کی فرار

ابتدائی اطلاعات کے مطابق یہ افسوسناک واقعہ ٹرک ڈرائیور کی مبینہ لاپرواہی کے باعث پیش آیا۔ حادثے کے فوراً بعد ڈرائیور موقع سے فرار ہونے میں کامیاب ہو گیا، جبکہ پولیس نے مقدمہ درج کر کے اس کی تلاش شروع کر دی ہے۔

ڈیوٹی کے دوران جان قربان

مرحوم عدنان مسیح سرکاری ادارے میں اپنی ذمہ داریاں بخوبی نبھا رہے تھے اور اسی دوران یہ سانحہ پیش آیا۔ وہ نہ صرف ایک محنتی ملازم تھے بلکہ اپنی کمیونٹی کے لیے بھی ایک ذمہ دار فرد کے طور پر جانے جاتے تھے۔

غم سے نڈھال خاندان

مرحوم کرسچن کالونی گورگھٹڑی کے رہائشی تھے اور اپنے خاندان کے واحد کفیل تھے۔ خاندانی ذرائع کے مطابق وہ چار بچوں (بیٹیوں) کے والد تھے۔ ان کی اچانک موت نے گھر میں کہرام مچا دیا ہے۔

سب سے افسوسناک پہلو یہ ہے کہ ان کے بچے اپنے والد کا انتظار کرتے رہ گئے، جو انہیں ایسٹر کی خوشیوں کے لیے باہر لے جانے کا وعدہ کر کے گھر سے نکلے تھے، مگر واپس نہ آ سکے۔

شہریوں کا ردعمل اور مطالبات

واقعے کے بعد علاقے میں شدید غم و غصہ پایا جاتا ہے۔ شہریوں اور مسیحی برادری نے مطالبہ کیا ہے کہ فرار ڈرائیور کو جلد از جلد گرفتار کر کے قانون کے مطابق سخت سزا دی جائے تاکہ آئندہ ایسے واقعات کی روک تھام ہو سکے۔