’’ستھرا پنجاب‘‘ مہم کے تحت بھرتیوں میں بدنظمی پر شدید تحفظات

ساؤتھ ورکشاپ لاہور میں سینیٹری ورکرز کی بھرتی، امیدواروں کا احتجاج
’’ستھرا پنجاب‘‘ مہم کے تحت بھرتیوں میں بدنظمی پر شدید تحفظات

Sanitary workers protest during recruitment process at South Workshop Lahore 2026

لاہور: (یعقوب مسیح، چیف کوآرڈینیٹر نوائے مسیحی)  آؤٹ فال روڈ کارپوریشن چوک پر قائم ساؤتھ ورکشاپ میں سینیٹری ورکرز کی بھرتی کے دوران بدنظمی اور ناقص انتظامات کے باعث متعدد امیدواروں نے شدید احتجاج اور تحفظات کا اظہار کیا ہے۔

امیدواروں کے مطابق انہیں مختلف اوقات میں بلایا گیا، مگر موقع پر پہنچنے کے بعد بار بار لائنیں تبدیل کروائی گئیں جس سے بے یقینی اور ذہنی دباؤ کی کیفیت پیدا ہوئی۔ کئی امیدواروں نے دعویٰ کیا کہ نہ تو باقاعدہ انٹرویو لیا گیا اور نہ ہی جمع شدہ دستاویزات کی مکمل جانچ پڑتال کی گئی۔

طویل انتظار، مایوسی اور واپسی

موقع پر موجود افراد کا کہنا تھا کہ وہ کئی کئی گھنٹے انتظار کرتے رہے، لیکن واضح ہدایات یا منظم طریقہ کار نہ ہونے کی وجہ سے متعدد امیدوار مایوس ہو کر گھروں کو واپس چلے گئے۔

متاثرہ افراد کا کہنا تھا کہ حکومتِ پنجاب کی ’’ستھرا پنجاب‘‘ مہم ایک مثبت اقدام ہے، جو صفائی کے نظام کو بہتر بنانے کے لیے اہم قدم ہے۔ تاہم اگر بھرتی کے عمل میں شفافیت اور نظم و ضبط نہ ہو تو اس کا فائدہ مستحق اور محنت کش طبقے تک نہیں پہنچ پاتا۔

شفافیت اور آن لائن سسٹم کا مطالبہ

امیدواروں نے مطالبہ کیا ہے کہ:

بھرتی کے عمل کو دوبارہ منظم انداز میں مکمل کیا جائے

امیدواروں کو باقاعدہ انٹرویو کا موقع دیا جائے

دستاویزات کی شفاف جانچ پڑتال کو یقینی بنایا جائے

آن لائن اپلائی اور ڈاکومنٹ ویری فکیشن کا نظام متعارف کروایا جائے

ان کا کہنا ہے کہ ایک ڈیجیٹل اور منظم نظام سے نہ صرف میرٹ یقینی ہوگا بلکہ بدنظمی اور سفارش کے خدشات بھی کم ہوں گے۔

وزیر اعلیٰ پنجاب سے نوٹس لینے کی اپیل

امیدواروں نے وزیر اعلیٰ پنجاب مریم نواز سے اپیل کی ہے کہ وہ اس معاملے کا فوری نوٹس لیں اور ذمہ داران کے خلاف کارروائی کریں تاکہ آئندہ اس طرح کی صورتحال پیدا نہ ہو۔

انہوں نے کہا کہ روزگار کے مواقع پہلے ہی محدود ہیں، ایسے میں بھرتی کے عمل میں غیر یقینی صورتحال غریب اور مزدور طبقے کے لیے شدید اذیت کا باعث بنتی ہے۔

کمیونٹی کی آواز اور ہماری دعا

نوائے مسیحی محنت کش طبقے کے ساتھ کھڑا ہے اور شفافیت، انصاف اور میرٹ کی بالادستی کا مطالبہ کرتا ہے۔ ہم دعا گو ہیں کہ خداوند ایسے تمام نوجوانوں اور خاندانوں کے لیے آسانیاں پیدا کرے جو روزگار کے حصول کے لیے جدوجہد کر رہے ہیں۔